Nosc obietif sciöche Euregio Tirol-Südtirol-Trentin é chël da ti pité ales zitadines y ai zitadins proiec concrec ti seturs plü desvalis dla vita: dal tunel de basa dl Prener ala cherta EuregioFamilyPass al boletin dles lovines rovan al boletin dl meteo unifiché. Cun la cooperaziun sura i confins fora orunse cherié n valur implü y mostré les oportunités desvalies che i trëi raiuns nes dá. L’ Euregio Tirol – Südtirol – Trentin é caraterisada da na varieté linguistica, de paesaje mo dantadöt ince da na storia y da na cultura che é nosc liam plü sterch y nosc potenzial plü gran por le svilup tl dagní.

Le Bolzano Film Festival Bozen é n festival che porta vigni ann da d’aisciöda le cinema d’autur dla Talia, Austria, Svizra, Germania y de atri Paisc sön i monitors dl cinema dl Südtirol. La fondaziun dl festival é stada tl 1989 sot al inom “Giornate del cinema di Bolzano”. Al é spo tres gnü plü gran cina che al é deventé na manifestaziun internazionala de cualité che ne ó nia ester “mainstream”. Registes y regisć jogn á la poscibilité da presenté sü films sciöche ince personalités bele conesciüdes a livel internazional. Tratan le festival vëgnel metü da jí workshops, evënc y ofertes formatives en colaboraziun cun la scora dl cinema Zelig, la FAS (Film Association of South Tyrol) y IDM Südtirol/Alto Adige.

“Sonns nüs por ciaré al dagní”. Le Südtirol Jazzfestival Alto Adige coliëia sonns y posć. Le jazz modern y sü stils musicai vëgn coliá cun posć particolars y al nasc insciö paesaji nüs. Tratan le festival vëgn les munts, i lec, i rüs, les plazes, les strades, i parcs, i ciastí y les strotöres produtives dl Südtirol contaminades cun la musiga dl jazz. Al nasc: sonns, musighes, rëis, proiec y grups musicai. La lerch urbana, parëis de pera y contrades da munt, manifestaziun culinaries y musiga sota devënta n elemënt su che ti pita al publich n’esperiënza particolara.

Weigh Station tl Waaghaus inviëia, promöi y sostëgn na community de jogn profescionisć dl monn dla cultura y dla creativité che é atifs tl Südtirol y che á inom: i/les waller. WS é n laboratore che pita ocajiuns de aprofondimënt sön les esigënzes di operadus y dles operadësses culturales y creatives de döt le teritore. Ara prô ince da dé n impuls por na riflesciun publica sön le signifcat y le valur dl laur creatif.
Weigh Station é n punt de incuntada por la formaziun tres workshop cun esperć y che pita na consulënza y Calls de produziun, proietaziun y de promoziun de ocajiuns de networking y de colaboraziun.